Op vakansie in Namibië (Deel 2)

Toe ons 2 weke in Tsumeb tot ‘n einde kom, is ons na my ouers se vakansie huis in Hentiesbaai vir die 2 weke wat ons saam met my familie sou deur bring.

Ou-kersaand het ons ‘n familie ete gehad.  Ek was in beheer van die tafel versiering en my ma vir die kos. Sjoe, het sy vir jou ‘n maaltyd opgekook. Ek lus nou nog daai lekker kossies. Dankie ma.

Ouma Hattie het vir al 3 niggies dieselfde rokkies gekoop. Hulle het so kosbaar gelyk, maar probeer hulle nou kry om stil te sit en glimlag vir die kamera, ontmoontlik. Nes die een reg sit dan kruip die ander een weg. So hierdie is ongelukkig die beste foto van almal wat ek geneem het.

"Kersvader het hier by die see ook kom kuier, maar dit moes 'n ander een gewees het, want hy het nie soos my pa geklink nie en hierdie keer was ek nie so verskriklik bang vir hom nie. Ek het hom darem 'n soentjie gegee."

Vandat Marli gebore was, was sy nog nie regtig oud genoeg om strand toe te vat nie en toe sy was, toe was dit weer te koud en reënerig. Maar hierdie Desember het sy nou regtig leer ken hoe dit is om strand toe te gaan vir die dag en in die sand en see te speel en swem. In die begin het sy so bietjie gegril vir die sand, maar toe sy dit eers gewoond is, het sy dit sommer begin eet.

Nog ‘n dag van groot vreugde, maar ook baie trane, was 31 Desember. Ons het nog so in die kombuis rond gehang toe my ma ewe skielik begin sê “hier kom sy”, maar ek was nie bewus waarvan sy praat nie. Sy sê toe vir my Marli het begin stap. Sy het Marli toe weer gehelp om mooi reg te staan en haar balans te kry, en toe sy laat los, het Marli geloop todat sy die speel ding op die grond gesien het, en toe is dit verby. Ek het so hard geskree soos die dag wat Collin my gevra het om te trou. Maar daarna het die trane weer gevloei, want met elke nuwe stap word my babatjie net groter en groter. 

• In die tyd wat ons in Henties was het Ouma Hattie haar geleer “babatjie” se. 
• Ouma het haar ook geleer om die pop te vat en vir haar “Doedoe-babatjie” te sing. 
• Sy het ook ewe skielik begin se “kyka”, wat beteken kyk daar. 
• As ons nie seker was nie, is ons definatief nou seker dat haar eerste word Pappa was. Sy het dit altyd net gefluister, maar hierdie vakansie het sy dit al hoe meer duideliker en harder gesê, en laat pa nie reaggeer as sy praat nie, dank tik sy hom so op die skouer en sê pappa todat hy vir haar kyk. Hartseer vir my om te aanvaar dat mamma nie haar eerste woord was nie. 
• Sy het ook ewe skielik begin die selfoon, of enigiets wat soos ‘n foon kan lyk, by haar oor te hou en klip hard te begin gesels. 
• Sy het ook mooi geleer hoe om dankie te sê as sy iets aangee. 

Nuwejaar het ons soos ouder gewoonte by die Burger’s gaan feesvier. Dit was 'n rustige aandjie. Lekker om buite in die vars lug te sit en die geselsskap van vriende en familie te geniet. Hierdie jaar het ons 'n lekker Chinese braai gehad.

Soos alle lekker dinge, kom alles tot 'n end en moes ons die 2de Januarie weer terug draai Kaap se kant toe.  Ek het saam met Marli agter in die motor gery om haar besig te hou in haar wakker tye en ook makliker om haar te kan voer en so aan, toe moes Teddie maar op die voorste sitplek sit, en om seker te maak ons kry ni e'n boete nie, het Teddie ook sy veiligheidsgordel aan gehad he he.

Baie dankie aan al ons familie vir die heerlike tyd wat ons gehad het in Namibië. Dankie vir al die liefde en bederf en baie baie dankie dat julle vir Marli soveel liefde en aandag getoon het. Ons is baie lief vir julle. Voorspoedige 2012!

Op vakansie in Namibië (Deel 1)

Ons het die oggend van 4 Desember vroeg uit die Kaap uit vertrek Namibië toe. So opgewonde dat die familie bietjie vir Marli beter kan leer ken, nou dat sy ‘n persoonlikheid ontwikkel het. Die vakansie het nie so lekker afgeskop nie, want ek word daai oggend toe wakker met ‘n maag virus. Dit is glad nie lekker om 10 ure op die pad te wees met ‘n besige baba as jy so olik voel nie. Al wat ek wou doen is om te lê en slaap en al wat Marli wou doen is speel (Sug).

Ons het daarom maar oorgeslaap in Keetmanshoop by Maritz Country Lodge sodat ek kon rustig verkeer. Ek was verstom met die pragtige kamer. Baie stylvol. (Dankie ma vir jou goedhartigheid om vir die kamer te betaal het). 

Omdat ek nie die krag gehad het om te staan en met Marli te stort nie, moes die wasbak maar as ‘n bad vir Marli dien.

Vroeg die volgende oggend het ons vetrek na Okahandja, waar ons die aand by my ouers sou spandeer. Ons het toe ‘n vinnige pit stop gemaak by my susters in Windhoek, en die niggies was so opgewonde om ‘n nuwe maaitjie te sien, dat Marli sommer dadelik moes inspring en saam swing ry.

By my ouers die aand, het ons besluit om solank vir Marli die stootwaentjie met blokkies te gee wat ons vir haar as kersgeskenk gekoop het sodat sy die loop solank die vakansie kan beoefen, en ons het skaars die waentjie aanmekaar gesit, of Marli het die hele huis rond geloop en stoot. Sy het dit verskriklik geniet om mobiel te wees.

Die volgende dag was ons weer oppad Tsumeb toe vir die eerste 2 weke van ons vakansie by Collin se ouers. Marli se ouma en oupa Prinsloo. Ag toggie, die twee was so opgewonde vir ons kuiertjie. Die hele huis en jaard was vol speelgoed vir Marli en in haar kot ‘n GROOT teddiebeer en ‘n stel nuwe kleertjies. Te dierbaar. Die teddy is amper 3 keer Marli se lengte. Maar sy was baie gelukkig met haar nuwe teddie, veral as dit by slaaptyd kom.

In die tyd wat ons in Tsumeb was het Marli nog ‘n tandjie gesny, nommer 5. Nommer 6 is ook amper daar. Sy het ook geleer om haar tong vir ons te wys as ons vra: “Waar is Marli se tong?”

Marli het dit vreeslik geniet om haar waentjie rond te stoot, ons moes maar bont staan. Ek en skoonma het haar maar eendag in die straat laat afstoot todat sy moeg was, arme kind, die volgende dag was sy nie meer lus vir stoot nie.

Ek het gedspot en gese dat ons ‘n klein prinsessie van die Kaap af saam gebring het, maar in Namibie het sy geleer plaaskind word, want een oggend na ontbyt, tel ouma haar mos op die tafel, en daar loop sit sy wydsbeen om die swart pot en eet sommer die pap so met haar hand uit die pot uit, en ouma moes ook saam eet.

Marli het haar eerste regte Kersfees beleef, toe pappa “Krismis-vader” moes speel een aand vir al die niggies en nefies. Sy kon nie verstaan hoe hierdie lelike ou man soos haar pa klink, maar nie soos hy lyk nie. Was maar skrikerig vir die ou man.

Ons het een Sondag toe die motor gepak en deur gery Etosha panne toe vir die dag. Ons het die gewone wild gesien wat jy maar elke dag sien, maar 2 diere wat ‘n hoogtepunt vir die dag was, was die luiperd wat langs ons verby kom loop het en die groot Olifant bul wat ons by die een watergat gekry het. Nog nooit was ons so naby aan hierdie 2 dierie in die wild as op hierdie dag nie.

Die volgende Sondag het Collin en sy broer gaan golf speel en ons besluit toe om dit ‘n familie dag te maak. Ons meisies het die karretjies gery en die manne het gespeel. So lief as wat Marli vir bestuur is, was sy meer gepla oor die stokke en die balletjies as om die karretjie te bestuur, maar ek het myself geniet.

Hier is so paar fototjies van Marli se tydjie in Tsumeb: